Hasrin Zulthain Bersah

I tekei gelah selese Kati mepat sesi jemet sesi lise Kerna si nenget gere telas benee Bise simurasa itaringne kin tene Pelongohen si jeroh bubunge Gere kona sire ike uren lao Putu Murasa we porakke caya ni matanlo k si alus kune ne nutupe Beriring remalan wan sara dene Macam berbage cerite sirike Kutujuen kati gere musampe Sikerna nge mame janyi setie Pinangan, 11Juni 2017

Pesesuk lah ni belang Betangang kin penggerle Penegut tali murentang Temerbang sigaeh munyino Jamu si gaeh mukekamang Bediang kubatang muleno Gere pernah asal i undang Ku batang ruang renye semile Tegu getih peregang Mugerancang laing mupayo Gerle sitemuni wan batang Meh kabang taok gerico Tetakut mien i pasang Pumu murentang kelem porak lao Senuen gere ilen ilang Nge minter sawah simurai jengo Pinangan, 16 Desember 2016

Win.... Taon belongohmu gerene musupu Seserenmu nge mupinah rering Denemmu gere mutaon mungadu Singukmu kusi mupari laing Win.... Kamulni bahgiemu gere ne mutumpu Reduk ni matamu sabe wan bening Ralanmu enti kire kase buntu Mutujumi selalu enti muputer jening Win... Raneh ni emismu nge bebantal pumu Iwan nipimu gerene mulaing luting Kunulmu asa wan kekuden atu Lauh ri matamu tetep munenting Win... Gerlemu osop gerene ara si munalu Kusi de musilu paong ralan beriring Mukale ni ate kusa mungadu Jarak ari ama ine gaipdi taring Pinangan, 11 Juli 2017

Petemun mulintes wan senye lao Munaringen tene ujung ni mata I simpang ni dene teridah rupe Panang muresie kujantung rasa Bebayang osop wan remang ketike Mujadi nimo rilipi gelana Gerene emis i melem bute Kemang ni bunge munaos astana Menet remalan rempak simujule Berue kin ine bujange kin ama Osah bertiro jurah berterime Wan batil tembege musiret makna Atur ni kata berperi mestike Cerak i susun mujadi basa Semet i semet ahere mu punce Roa teniro isapaten sara Pinangan, 12 Agustus 2017

Gerene ku ingeti laing silepas Oya nge ranas ike ibarat kero Munuruhen limus nge lagu enyas Rupen turah iramas jep berganti lao Nge kuanuten ku waih deras Kerna gere pantas kin paong kekede Sawit kucak munuruhen ganas Rupen iyok kertas pengamul ni tume Turah i renahen enti oloktu atas Iamatpe lepas gere daleh berjangko Berperi lemak i pengepe temas Gelah lagu emas taso wan pure Pinangan, 13 Agustus 2017

Keruhni waih gere bertibuk Pora muaduk tawarpe bene Si munaso bengi murasa gabuk Taringne reduk i sagi ni dene Telege si engel jangko bertungkuk Munepinen suntuk kin pelale ni ate Ari kerna bijaktu udah muterkuk Mujadi singuk ku rering besere Kayu pelongohen merawe mulapuk Mepat pesesuk munampi sulihe Gaeh ni leping ike pora muantuk Timul ni gabuk ate murense Mujadi resie ku tubuh museluk Kenyeh mululuk mungarui ate Beluhni galak ari wanni tampuk Nge taring tumpuk taonne muserme   Pinangan, 04 Maret 2017

Tuni tunipe teridah Kerna turah musikah ari sidele Ari bilangenne asa gere berubah Simupinah mepat itungenne Sunguh sunguhpe berakah Kerna awah becerake pane Tujun maksudte kati ipepilah Mubeda amanah urum tetakie Ikot ikotpe muluah Kerna nge juah ari puncee Kin munoromme olokdi payah Gere serilah niet wan ate Betul betulpe mucogah Kerna gere sawah kenak ni ate Munepatne olokdi susah Mupolok turah kunehpe lengkunge Tapi tapipe mubelatah Kerna serapah kesek niniyue Mukamul ni ampa gere tesikah Seger emah mujadi perange Pinangen,  29 Juli 2017

Inile Reje si kin teleden Buet i arangen gere sesara jema Orom rakyat musara peden I musyawarahen sanahpe rencana Nge makin dele se perubahen Olok mukemajuen Kampung Lot Kala Dele ni buet si i rencananen Bewene berjelen gere mucela Nguk kin conto sana sibueten Gere i tuninen ilmu siara Nge ternahma gerel ku lueren Reje panuten i Nenggeri Antara Tanoh si kosong i isi senuen Lepas i pergunen hasil siara Orom orom renye i bueten Musara peden orom pemuda Gerene ledak i lao uren Sikerna jelen gerene nyanya Gere ne pekekune sinentong serinen Gerelni ni jelen jep simpang nge ara Kin silaturrahmi i aran pertemuen Renye i kamulen sudere siara Sesire cerak cerak i osah usulen Program lanjuten rum dana desa Semingu seger turun ku jelen Renye mubersihen sampah siara Sesire bebuet tangkuhne harapen Buge kuarapen enti ne ara Sudere sisingah gelah muketerangen Renye i entongen umah siara Buge kase jelas keduduken Empu ni umah muloi i data    ...

Pongot ni langit gere berede Pusesepak wan melem bute Simumenge nge turah jege jege Buge gere kase kin bele Wih si metuh berulen ulenen Berdedik rami berkekulenen Seba berharap oya harapen Mubasahi bumi munetahi senuen Si berate macik gere pure Geh ke mien wih simujengkele Tatangen pumu renye muniro Jarak ni Tuhen mi ari kami bele Rerak si kucak nge bala bili Geh ni wih lagu si talui Ku jelen renye muluahi diri Ku umah si renah munyingahen diri Wan kemaro rerak gere beriro  Sampah mutumpuk dum sijule Teduh plastik geh guni tue Nge gerico so mamuk ijo Pinangan, 19 Oktober 2015

Simunemeng luge olokdi rami Perau penampi geniring ni pante Munuju pulo taon ni janyi Kekire ni ate buge musampe Nge mubisik kusikuen kiri Langkah arapni enti ne lale Ike kase aku munamat kemudi Gerene nyanya kite ahere Empu ni perau asa galak penadi Sigaeh murai olokdi dele Taringne tikik kin tene jadi Keta ku si musimen terarap kunule Ku biak sudere renye silaturrahmi Sesire ngupi sawahen maksudte Nge turah murum kite kali ini Buge kin uah bunge wanni tangke Kin tene urum perahen pepanyi Sisabe mukemang bier gaehpe bade Enti kase murebah ike iserei Pantik tiange sitegep kayue Pinangen,  26 Juli 2017

Apakah semua daun itu harus seranting Meskipun hijaunya menyerupaimu Pohon itu pohonnya bukan pohon kita Angin sajalah yang menghembuskannya hingga kadang menyapa kita Tapi bukan milikku bukan milikmu bukan milik kita... Tak perlu resah Tak perlu gundah Kamu masih tetap melekat diranting pohonku Kamu tetap daun yang menemani rantingku... Pante Karya 2015

Serupe kao i ujung ni senye Lungun reduk jangin munalu Rum emus ni kuyu si gaeh munalo Gabuk gerico simunaso rinu Mujadi bebayang wan melem bute Taringne resie ku bintang pitu Rum cahya ni ulen si gaeh munene Gintes gerle simubatang perdu Reff. Lawi kucak i telege Sibegalak munaos supu Temengen keni kemekken buke Nge mutetah taon musilu Berules upuh wan terang lao Beluh bejule mepat mutentu Osah beterime kayuhni luge Janyi mikot wan sara perau Kelibet mulintes iwanni jege Singah wan nipi lagu si munalu Rum kemamgni bunge menet besene Galak gure musara kuru Pinangen, 13 April 2017

Nge mutamah bilangen umurmu Rembege si sesuk nge kin tupang tumpu Enti macik kire ate karu Do'a ni kami sabe ku kao mutuju Buge jeger jeger sabe tubuhmu Harap ni kami ku kao engingku Enti bimang kao enti ragu Ara ilen kami si munyayangimu Sir berdo'a munatangen pumu Ku Illahi Rabbi renye mutuju Buge bahgie kase muripmu Ari kami sisabe mungaleimu Mudahmi rejeki sawah kutenumpitmu Buge mujadi nyata si wan amal tidurmu Gere wan nipi we telas bahgiemu Ini ara kami sinemah denem rinu Sabe kami kalei luah ni kedikmu Orom cerak menye sire sisu sisu Beluh dediang beramik pumu Sampe mubayang mien kisah si lalu Berijin keta ucepen ari aku Singe berate ikhlas kin paong muripku Dele tenironmu sigere terosah aku Enti kire kase ues atemu Selamat Ulang Tahun engi Selamat Ulang Tahun Ine Ari kami si munyayangimu Pinangan, 22 Maret 2017

Bise ni tubuh i emah emah Gere nguk teridah mutene ku rupe Ari deleni heme ara we si salah Terupen seba munetah i melem bute Gaeh ni jamu wan ralan serapah Laing i luah sesire besene Ari bijakni pumu sibidik mujurah Rupen seger mah orom pendere Pulih ni rembege siturah bertetah Renye i perah si lepas munyino Lao ku lao sabe wan gelisah Iwanni langkah pe mejen gerle Asa seba nge beta bang turah Kegere berolah bise rembege Si terang engon udah gere terosah Sigelep teridah bun kin pemelie Berserah diri kite ku Allah Buge gere sesanah kase tubuhte Jarakmi bele seterupe enti teridah Orom izin Allah bewene semperne Pinangan, 16 Januari 2017

Inile Reje si kin teleden Buet i arangen gere sesara jema Orom rakyat musara peden I musyawarahen sanahpe rencana Nge makin dele se perubahen Olok mukemajuen Kampung Lot Kala Dele ni buet si i rencananen Bewene berjelen gere mucela Nguk kin conto sana sibueten Gere i tuninen ilmu siara Nge ternahma gerel ku lueren Reje panuten i Nenggeri Antara Tanoh si kosong i isi senuen Lepas i pergunen hasil siara Orom orom renye i bueten Musara peden orom pemuda Gerene ledak i lao uren Sikerna jelen gerene nyanya Gere ne pekekune sinentong serinen Gerelni ni jelen jep simpang nge ara Kin silaturrahmi i aran pertemuen Renye i kamulen sudere siara Sesire cerak cerak i osah usulen Program lanjuten rum dana desa Semingu seger turun ku jelen Renye mubersihen sampah siara Sesire bebuet tangkuhne harapen Buge kuarapen enti ne ara Sudere sisingah gelah muketerangen Renye i entongen umah siara Buge kase jelas keduduken Empu ni umah muloi i data Pinangan, 31 De...

Mupinah ulen muganti bilangen Mubekas ke die iwan ingeten Macam berbage asal perbueten Mukejadien bang die kase Pari ni tubuh muperubahen Gere ne dele penemah ni beden Beben siberet turah i kurangen Sikerna perumuren mutamah bilange Mubah perange mulaen teniron Turah mutentu besilo pemanganen Siteger lemut turah i pisahen Kerna gere ne tehen simungengale Gere ne tertunung jarak ni penengonen Sikerna ralan nge turah i tupangen Kenak ni ate mepat situnungen Muperulukken nge kin batase Tetahi nemah i ujung ni perjelenen Dele i perah si beret kukuen Sikotek beluh sijeroh taringen Buge timangen genap ahere Majuni denie muperkembangen Turah bepilah silepas i bueten Olokdi simen se perubahen Jegei imen enti sawah lale Pinangan, 31 Desember 2016

I bilang siara i kite Enti i kire sigere mubene Gere terosah bier betiro Enti nye mujangko mujurahen pumu I timang siberet murege Simujerilep terang nume tembege Gere kin suluh wan melem bute Selo bergune kin penemah ulu I mai sikona pemango Nge turah i rai orom munalo Nume pantas kati berulo Kerna sitermulo turah simutentu I umah kunul semile Nampin jurah edangni jengo Gere sirai kati geh simujule Ike rejekite nge turah sawah simunetok pintu Pinangan, 02 Januari 2017

Nge rubutu bang pelongohen Oya kati senuen murasa gerico Gere tebuh uet bier i siremi uren Makin lemasen i wanni kemaro Nge osop ari pumu lelon Oya kati geleson gere mepat laho Rami mukamul biak urum serinen Sampe kemuhen sibedaring iyo Nge deletu bang rering nisuyen Oya kati simunengon gere ne tertuho Temas asa kin seserenen Sibise beden rupen simuyino Nge engkip wih wan penibuken Oya kati gerahen si munemeng time Taring wih si mulimen Simunenumen gere mubetih bele Jagong, 03 Januari 2017

Anakku... Bersiosahen ike lepas i bagi Bersitironen ike turah berkembali Kin lebihe keta oya penosahen Kin kurange turah bersiizinen Anakku... Enti mulebih peri munyorah Enti mukurang sawahni amanah Kin galake gelah mutepi Kin uese kase gelah bemari Anakku... Ku simunosah gelah berjangko Ku simujurah kire berterime Kin awinne enti sampe mutewah Kin lenoe kire gere murebah Anakku... Sediken salah bersiingeten Sekire benar bersisawahen Kin jerohe berturut payu Kin kotekke parin kuduru Pinangan, 06 Januari 2017