Hasrin Zulthain Bersah

Nge mutamah biak orom sudere Bierpe gere pernah mudemu rupe Wan ni fb renye becerite Munetah langkah male kin reje Sesara renye kin paong Nge mumerah madu se gegoyong Sesire remalan jenyong jenyong Buge demu sudere si kin penolong Dele rakan sebet si berjeroh ate Munuruhen tingkah siberbage bage Muluahen kekata dem bebelangie Muniro dukungen asa sabe sabe Bewene jeroh sikite oromen Bierpe oya seba kin lewen Sikerna mumilih ara mujarak ilen Itetah sijerohe kati enti kin penyesalen Ku bewene kite kase gelah seber Sikerna dele si male berketier Bierpe telase seba setun seger Asa nge beta buet teku muger Pinangan.22042016

Ulu nome gere daleh i seder Enti mukeber ku jema dele Silepas i sebu entimi i unger Kati enti musesier macam berbage Emus ni kuyu arahe mutetuker Gere munosah keber kusi alae Anyungni lelayang urum ate seber Kati enti mukiser kase tayange Ku bangur ni rara enti i teber Bierpe utem teger tair i berene Gelah pane pane songkoten i jungker Kati enti mutempier kase asappe Tetah berongot nume kin inger Tenenge pe jinger munuet maknae Alusni basa peri munyeder Kati enti guser sibergeli ate Telas ni cahya iwanni eber eber Munerime pejer bergalak sabe Sepeden ni gelep pakat rum siner Kati enti lao simubiner osop bebayange Pinangan, 01 Februari 2019

Sesemahen si nge mupinah Berosah si kin pemelie Beruet gere teridah Mujurah gere bertene I tuenen si mengkal matah Borok ni uah gati isesino I awin gere nguk mutewah Murebah sekire i jangko Pembubuh nume kin tamah Beserah tene setie Ralan ike nge mubeda arah Amanah gere ne bergune Betulis wan kertas serilah Betenah sigaeh mujule Ku sirami gere nguk teridah Serapah mujadi resie Mutentu bilangen i erah Kati enti salah sana siterime Kin paong siatas renah Mupinah taon muniro Pinangan, 10 Februari 2017

Nge teridah taon pelongohen Kin seserenen buge kase musampe Murum mi kite wan sara tamunen Enti bersitulaken uah wan sara tangke Nge mari kite berulon ulonen Nge kite engon si keras sangkae Si taring i kuduk renye i nampinen Kerna bewene serinen ike munurut dalile Si mulo sawah kire gere lupen Sikerna siterpuren si munulone Buet murum asa turah beriringen Bersitulungen enti kire mucere bere Cabang urum ceding asa gere terdisen Mubeda kenunulen oya nge resamme Asa nge turah muterkuk senuk orom kuren Tapi gere tertumpelen kerna siep ilen kelilike Murummi kite wan sara kenunulen Enti ne bersisingkulen kerna mubeda ampange Sire cerak cerak sana silepas ibueten Bier seserenen ni beden mubeda reringe Pinangen, 23 Februari 2017

Terpuk paong ni bandang Sana kati uah ni jepang gabuk iawasi Lasun siturah i layang Sana kati kacang menet i ledei Kuyu munayangni lelayang Galak temerbang mulikaken uki Iunur rum naruni benang Tesana kalangmemang simunamat tali Manuk bejunte i cabang Galak senang mugepilen uki Laing lungun berdenang Nguk perok ilang sibuk betari Bunge sitengah kemang Atas lao timang mampat belangi Wanni senye pulelingang Simate batang nguk kerpe rui Tersik tegep bepancang Turah silempang kati serasi Teger kayu si kin tiang Nguk keloang menet i kawati Pinangan, 27 Februari 2019

Sayang ni bunge si wan batang Tengah kemang i galakki nami Gatitu bang singahi kalangmemang Oya kati mulekang ruluh ku bumi Emussi kuyu selalu mutayang Minah batang ruang ko tajuk renggali Wanni janyi nge kao sepasang Turah setimang iwanni peri Tangkemu sigati mulingang Sabe terkenang kusi munyingahi Mujadi rinu i mata mubayang Mujelasi utang iwanni nipi 10 maret 2017

Koro jamu munentun cara Osop ni nahma empu ni nenggeri Batang edang serahen ku jema Muharap ara si sikunul kenduri Si gaeh singah munewei istana Simunyeluken mahkota kunul tersagi Benemah ulak mungemasen reta Taring ne sesara ku si muningkupi Sareh panang sitelas nyata Keta sinyanya si lale wan nipi Si munyino munyuket timang ku neraca Pecengang petama si sesuk rami Muniru pesam rap ku rara Si porak pora semile ter tepi Ceracak si soh parin wan para Belanga si misi i sagi keliliken bepari Munuruhen tetilok ku belang raya Sitelas ku mata renye i tenei Muluahi gigih si berate rela Berulih pesaka nume biak diri Si laneh remalan munamat piala Si keras sangka bun kin perami Puren sawah munamat bendera Termulo teridah munamat tali Empus Kucak, 15 Maret 2019

Rempak kamul simusidik sasat Taon berpakat kunul semile Munosah petuah asa gere nguk jengkat Sikerna nge tepat taon mungune Cerak wanni sene merawe jerkat Gati we lekat mujadi basa Urum laing mejen munyenawat Taringne bekat masa kumasa Ari bijakni awah seba kin manat Gelah musesapat sesabi diri Si tungku tingki enti i kerat Enti lagu karat munyalupi besi Siwan genggemen silepas i amat Sigere lekat enti isapih Taon situju siterang alamat Kati mepat mepat kiding beralih Beta amanah gere ne sengkerat Gelah hemat hemat keta jinger jinger Kati denie akherat kase selamat Arahni Kiblat enti i tetuker Pinangan, 09 Maret 2019

Ku ikoten bang ku roa suyen Buge lepas munehen sana si jemur Serit pulih bun kin simpulen Temas i tegangen sekire kase kenur Porak lao kelem gere kuluahen Udah kase lupen peningeten munatur Ku bubuh warna sinyerlah sesilon Sikerna penengonen merawe sapur Taonni silep kite merawe lupen Sikerna mubilangen penamah ni umur Arawe we kase lale upuh wan jemuren Gere ninget i angkuten sehinge luntur Peneking ni suyen tegep i sesuken Sabe i pedeten tanoh si gemur Ku sesino batang ku engon engon Enti sampe berumah umahen taonni bebur Kin pari ni tali kire gere lupen I engon engon udah mutetur Sikerna suntuk iwan ni daringen Gere kase  jalinen tangkuh ari atur Empus Kucak, 07 April 2019