Hasrin Zulthain Bersah

Osop ni harapen wan empus kucak Gere mera tasak kengon peruahen Mutik si dele asal nge mulimak Kering wan porak i cabang bergantungen Tanohhe kering asa gere ledak Tetemas mujejak wan pelangkahen Urum lues ni belang wan pematang cacak Seringkel tapak limus alam alamen Bierpe pupuk mah sara gerbak Senuen gere galak sara perempusen Ari kuen kiri ramidi bersurak Kenake muruntak kayu peruluken Seumpama kulem nge mutemak Taring ne ledak mubekas loloten Nge meh beden kona lutak Luah mien gule kucak ari wanni iwen Wan jamur sedang dele sibegerdak Taringne remak ku rering suyen Gehpe si munetah rupen gere kin galak Keta kati renye ulak mien ku pangkalen Empus Kucak (Gemboyah), 14 Juni 2019

Gere daleh bejamu ike kolak ni ume roa are inih Orop nemenni gigih sanah gere demu Enti i pitet deh ulu ni wih Kati enti lanih mubasuhen pumu Berettu nemah kati nge musingkih Arang besapih jenujung ni ulu Gere ne wan pingen edangni bertih Sikerna besapih nuling rom ayu Cerak si kaul unang unang gere ne i betih Munuruhen gigih kuemus nikuyu Keber mutayang rum emun putih Nge lagu getih galip i tetegu Buet derong kenakken berulih Pire musempernih wan pingen atu Ike kunul mantong ilen teriwih Ku si gaih kin penerime ni jamu Elem elemen kenakken bersih Enti rum sara purih ike male munyapu Gere si coco galip puteterih Udah mubalik singkih pugegining ulu Pinangan, 22 Juni 2017

Gelah kase rubu sekire pelongohen Penampong porak urum lao uren Uwak ni hek taon seserenen Wanni ingeten gere mera bene Gelah kase naru seumpama jelen Penemah ni dene ku si pintenen Musara arah ku sara tujuen Bierpe telas tekongen si dele Gelah kase murum wan tenamunen Mutumpuk dele sara kamulen Berjujung beret berarang ringen Bersiurumen enti mucere bere Gelah kase luwes mata munengon Si terang nyata tures i panangen Ku kiri mujurah munosah ku kuen Bersitulungen oya simehate Gelah kin pemesam iwan ni sejukken Pemulih ni porak lepas i benginen I wan nome kin penipinen Kin kekalenen sabe wan ni ate Gelah mepat kase si kin tuntunen Al Qur'an hadits oya i pedomanen Bekal i denie turah i perahen Enti sampe lupen nemah ku akherat kase Prumnas Pinangan, 8 Juli 2019

Pelongohen gere ne rubu Taon musilu gere ne jenta Jerohpe rasukke muputuk we supu Munemah karu mujadi mara Tiang si sesuk kin tupang tumpu Asal gere naru lelepas i seta Mera mu polok kerna ari kayu Lengkung selalu pora mubeda Senggayun ku cabang besere ku perdu Berasup tungu ku mutik si ara Ngenakken uwah gere kase layu Sisawah ku pumu enti mucecela Mumarin kekire ku pesam ni niru Ku keliliken atu muniro rara Sesongkoten gerene ku kayu Asap mujebu mu ilangen mata Murai koboh ku porak ni siu Jelobok berlagu munemah basa Bibes ni senuk galip mugaru Hejep ni pumu mupetimang cara Pinangan, 21 Juli 2019

Bebelen gere ne me ling Wan jempung taring mu perdu cimo Usik jejunten ni gegiring Kuyu mulempusing gaeh mudere Tempeh gere mugeniring Lekang muleping patal ni ume Peruluken perdu ni wing Peger keliling munelepi kekire Pantik kayu mulenting Uluh si kering bun kin pepilo Keras puter mujening Si sara niring empas ni gegebe Getih berikot muriling Kin peneking ku batang ni gele Penampong i kemangen jaring Rupen mujadi aring ku si mujege Pepantaren i sesuken king Kin rering batang ni gelime Kenunulen bertete umping Tairdi muleping ku si timpuh semile Prumnas Pinangan, 13 Agustus 2019

Jelen si lalui gere bewene lempang Dele mu simpang urum tekongen Ike gere lepas ilen munamat stang Mera mujungkang iwan penangkoken Berbage curak si kin penumpang Oya nge terang dele ni teniron Ike gere pane kase mupetimang Mera bersitegang wanni perjelenen Nemah si ara renye i arang Turah i tatang ku taon si sedien Ikot ni tali gere nguk rengang Kati enti mutetayang bewene bertekaren Mejen kase mayo wan luang Mera muguncang singkih kiri kuen Cerak nupet tamah mien gerantang Kemiring pe ilang turah i gingen Urum sepir due turah setimang Urum urum senang musara ayunen Kune kati bewene kase nguk girang Gere musesirang sawah ku tujuen Si kerna taon mari jarak ilen i panang Pora mubayang telas pulo harapen Kekire si ara enti sampe mulekang Wan ni semiang berdo'a  ku Tuhen Dusun Prumnas Pinangan, 12 Agustus 2019

Begerdak kekanak i tete bersene Bersurak galak beriah rie Beledak lutak iwan lao senye Masa kucak olokdi gure Belejer ketier mununtut ilmu Munyeder berunger ari tengku guru Musier kiser gere nguk ari buku Belejer gere mubetih waktu Becerak lemak ku ibi mungadu Nge ara biak si sepapah sepupu Bekenak galak turah sara pintu Ku tengku kali si munetah tentu Amanah sawah ari Tuhen Si Sara Mutamah turah iwanni keluarga Nge ara seni si munalu ine ama Bahgie semperne ku ate murasa Pinangan, 15 Oktober 2017