Langsung ke konten utama

ENGI 1

Ini tikik kekata kuluah
Cerak sara patah peri sara kalimah
Udah kase ara si salah
Tabi ku tiro maaf kujurah

Orom Bismillah kao ku rai
Orom izin ni Allah renye ku mai
Sikerna ku kite nge sawah janyi
Setimang pasang mujeleni muripni

Susah senang nge kite rasa
Temas nyanya nge kin hiesen
Syukur rum ikhlas i kite turah ara
Nge kin penguet ike ara kejadien

Keta kin aku entimi kao gunah
Bierpe aku mera berberakah
Gere ku perah ni nong tamah
Nge genap sara kao kin pake umah

Ike kin aku entimi kao curiga
Bierpe gati becerak orom jema
I ateku tetap we kao sara
Gerene ku perah si bergerel isteri muda

Asal beluhku soboh ulakku ruhul
Sikerna buetku merah oros sekemul
Bierpe buetku mejen murakul rakul
Tete i umah tetap taonku kunul

Ike kin aku enti kao sangsi
Bierpe langkahku mejen kuso kini
Genap kao sara cinta sejati
Apalagi nge ara ni kite buah hati




Paong kedik dele kudemu
Penosop ni macik uak ni karu
Paong mongot kao we engingku
Taon mungadu sire bersebuku

Ara we mejen kite dewe dawi
Sikerna maksud ni ate gere termaknai
I tetah cara kite sulihi
Buge gere kin luju tejem ni rui

Takengen, 18 September 2015
Label:

Komentar

Posting Komentar

Postingan populer dari blog ini

ENGI 3

Nge mutamah bilangen umurmu Rembege si sesuk nge kin tupang tumpu Enti macik kire ate karu Do'a ni kami sabe ku kao mutuju Buge jeger jeger sabe tubuhmu Harap ni kami ku kao engingku Enti bimang kao enti ragu Ara ilen kami si munyayangimu Sir berdo'a munatangen pumu Ku Illahi Rabbi renye mutuju Buge bahgie kase muripmu Ari kami sisabe mungaleimu Mudahmi rejeki sawah kutenumpitmu Buge mujadi nyata si wan amal tidurmu Gere wan nipi we telas bahgiemu Ini ara kami sinemah denem rinu Sabe kami kalei luah ni kedikmu Orom cerak menye sire sisu sisu Beluh dediang beramik pumu Sampe mubayang mien kisah si lalu Berijin keta ucepen ari aku Singe berate ikhlas kin paong muripku Dele tenironmu sigere terosah aku Enti kire kase ues atemu Selamat Ulang Tahun engi Selamat Ulang Tahun Ine Ari kami si munyayangimu Pinangan, 22 Maret 2017
Posting Komentar
Baca selengkapnya

ANAKKU VIII

Bilangen ni umur opat mukire Khalisa Althaf kao i rasi Harapen ku kao gere terhinge Kasih sayang ama ine gere mutepi Tegep sesukmu mujadi bahgie Pane berkekire munetahi diri Harapen ni kami buge semperne Gere mukulu kie iwanni muripni Galakmu munaringen tene Kenyeh menye ku kerlang munyerei Pongotmu mujadi luke Gere berede wan tenumpitenni Kedikmu sesire bersene Renye muniro si male i kenakki Musampe turah si jangko Bierpe galah muleno turah we mujadi Ku Allah kamipe muniro Gere mera rede wan do'a ni kami Jarak ari seteru gaip ari bele Buge rembege gere mera lesi Pinangan, 23 November 2019
Posting Komentar
Baca selengkapnya

MUKISER

I tekei gelah selese Kati mepat sesi jemet sesi lise Kerna si nenget gere telas benee Bise simurasa itaringne kin tene Pelongohen si jeroh bubunge Gere kona sire ike uren lao Putu Murasa we porakke caya ni matanlo k si alus kune ne nutupe Beriring remalan wan sara dene Macam berbage cerite sirike Kutujuen kati gere musampe Sikerna nge mame janyi setie Pinangan, 11Juni 2017
Posting Komentar
Baca selengkapnya