Hasrin Zulthain Bersah

Empus ni nume empus taring Benyerre lempang senuen beriring Taonne asa i geniring Mupelanting ari jema rami Tanohhe olok belangi Ilang item teridah serasi Gere porak gere oloktu bengi Sana sisuen bewene mujadi Senuen siara memang dele Cumen bunge jarang teridahe Orop kin ceding seba kekiree Gere kin sanahpe lepas tergunei Batange rupen mukunah Oya kati uah kiset singah Jeroh ni tanoh gere kin tuah Dep beta i olah gere muarti Simungariti olok pedi simen Munyalupi batang berulen ulen Ike mera kite tebesen Ari kiri kuen gaeh murai Kerpe siara nume kerpe terih Lawissi pumu renye musingkih Gere nguk lale murippe lebih Orop munemenen gigih sabe mungarui Si kin jamuni kekire munetah Musara peden rum simulo sawah Semet ni tali enti kire muluah Kati enti muperngah awah ni guni Pinangan, 02 Desember 2018

Resie i tason wan dede Enti i uke ku jema rami Cerak ike gere i jege Ku kite mulak ni peri Ikhlas nume i awah taonne Tapi wan ate nise parie Gere si sepak ku jema dele Kati enti osop kase pahalae Sipatut bersebu enti ikuruki Enti ipeperi si gere terbaca Sigere terbaca enti i kalammi Kati enti kusi kusi simunaos makna Sijeroh bertaso sikotek berpari Genap i betihi rum siopat mata Enti kukuyu munayangen peri Kati kase enti munemah cela Gere perlu ibetihi jema ike munosah Gere daleh engon jema ike mujurah Enti arapni jema pupepegah Kerna sikite harap belesen ari Allah Pinangan, 30 November 2018

Kusa keta kusahanmi Benar berpapah gere ne ara Kusi keta kusihenmi Salah bertegah nge taring basa Kusa kite berama Ike buet mara gere ne terbebelei Anakte gere ne kin anak ni jema Gere terkoa ne buet kemali Kusa kite berama Ike sumang siara gere ne terkowai Gere munengon ku siberet mata Gere ne ara muniro tabi Kelibet tures ku mata Gere berperala janginni peri Ipenge cerak gere bermakna Kekuahni basa gerene muarti Kusa kite berine Ike gere ne berjege siturah i tuni Anak ni jema gere ne kin anakte Gere terbebele ike sanahpe terjadi Kusa kite berine Ike manat siara gere ne teranguki Gere ne besebu buet si hine Nge kin riah rie gah kuso kini Berlangkah tanang bergegure Tutur ama ine nge kin perasi Galak muluahi menye Iwanni senye mubilangi jejari Pinangan, 19 Nopember 2017

Reje... Sesuk ni batang mampat teridah Ulunge lemi rum bunge munyerlah Kekire mujadi kase mutik kin uah Enti kire musampe kuyu serapah Gere muluah ari tampuk selalu Tabi Reje... Rupe rupee ara ceding simenet singah Munuruhen diri dum sigagah Gere mera munuruti amanah Gere rela sekire i sikah Keta gelah kami osah tawar si pitu Reje... Musapat murum iwanni dulang Rempak beratur cacak i edang Arape muterkuk gere kire beranyang Enti kire sampe mutuang Gelah mutepang wan sara kuru Tabi Reje... Rupe rupee ara cemenca siroa tepang Wanni cawan galip bediang Galak gabuk mutetatang Galak sibuk putetanang Keta gelah kami tupang tinen rum pingen atu Reje... Wan kertas serilah nge mutenulisen Kekata berpakat huruf i susunen Nge sejudu baris isapaten Enti kire berulen ulenen Gelah mujadi basa wanni tamsilen Tabi Reje... Rupe rupee ara pena sigere rejen Orop ara gere terpegunen Kenakke musapat sara taon Kenakke mepat kin teturuhen Keta gelah kami parinen wan b...

Wo Reje..... Lagu senuen mumerahi dirin Gingne muawin awin asal sara perdu Mubeda pucukke Mubeda ulunge Ampuuun Reje Beta sine Menet kin uah so bunge ni kerpe Wo Reje..... Lagu bebayang mungenali diri Gingne begelep asal sara iringen Mubeda ralane Mubeda tujuenne Ampuuun Reje Beta sine Menet musara langkah simulaen arah Wo Reje..... Lagu emun siberiring naru Gingne iemusi kuyu asal turun kubumi Mubeda warnae Mubeda tamunne Ampuuun Reje Beta sine Menet kin nami so emun kelabu Wo Reje..... Lagu batang ni kayu iwanni uten Gingne i tebangen asal i pergunen Mubeda tegerre Mubeda lempange Ampuuun Reje Beta sine Menet kin rering so kekabu mumata Bintang , 04 November 2018

Gere ara tungul sigere buruk Nge turah lapuk i wanni donya Bierpe besilo tegep kao pesesuk Nge turah mubungkuk ike sawah masa Ike perupuhen sapih i seluk Benang simurasuk timul gelana Bierpe lipeten wan sara tumpuk Turah ku tememuk wan lemari kaca Jarilni waih kati enti museruk Parinen belbuk simuluang roa Kin penyompong kao kusi muputuk Dabuh pe tuktuk munuruhen gegara Mungenal tupang menet kupucuk Tetah pepiluk kusi namat bendera Tene mununung peanguk anguk Gere tuho gabuk bierpe kin temuluk ni jema Kin tene alamat genengen ruk Kati enti museruk wan blang raya Bierpe  kuet munyeluken tanuk Nge turah mugelduk ike nge tue renta Pinangan, 27 Oktober 2018

Dele nge sikite penge Sareh nge ipanang nyata Uren si kekale nate Nguk bencana pe nge minter ara Banjir bandang nge jep sagi Kayu orom atu dum sitalui Biak suderete nge bala bili Gere mepat sangka male temuni Tanoh longsor mucecerun Meh mutamun  ku atani jelen Tumpuk ni tanoh lagu i susun Sudere siliwet nge meh meten Geh ni wih gere terduga Gere terbaca tene si ara Totorpe metus mukerat roa Nge mupentas uken orom toa Sunguhdi sedih kite baca berita Pelin bencana kin judul utama Tatangen pumu tiro ku Si Sara Osopmi bele redemi bencana Pinangan, 23 Oktober 2017

Eh ku tetah bange mulo arih arih Simen di olok simunegu getih Nguk manuk manuk gere ara ne terih Sampe musesingkih tetakutpe musangka Eh deleni keber lagu jarilni waih Sibiasa terlelah se nge kuiwih Biasae betuni se nge kite betih Geh ni terih wan rami ni jema Eh gerene musara ikotni purih Siberus berus gerene bersih Esot ni pumu lagu besapih Tegu ni upih gerene mudaya Pinangan 20 Oktober 2017

Kekire naru pemikiren singket Munyalupi ate mutebiet Ike gere lempang aturni ni niet Muesot musier arahe Kenakken demu ikhtier kiset Ari taon kunul enti uwet Ike gere lepas muratani suket Munuet enti padehne Menet masin poa enti muet Ujung ni jejari i jejojot Ike gere tebuh mungengal lumet Mudolot arih arih turahe Mungenaken terang suluh i empot Kalei bebayang ku cahya mukelpot Ike gere ruh munyurungen songkot Agihne ongot terime arae Muniro uah inih teku sumpet Munegepi batang sintaken uyet Ike gere sangup wan tanoh liet Bebuet enti kire merke Pinangan, 13 Oktober 2018

Dulu... Air tak semesra ini mencumbui kita Tak serajin sekarang bertamu kerumah kita Tak sehitam dan sepekat ini yang datang Kini... Sepertinya kita mengundang mereka tuk mendatangi kita Kuatkah kita... Tegarkah kita... Ketika datangnya bersama bongkahan batu dan potongan potongan kayu yang membusuk... Kitalah yang memanggil mereka Kitalah yang mengundang mereka Ah... Semoga air akan tetap menjadi sahabat meski dia datang dengan murka dan amarah... Pinangan, 29 September 2018

Lagu punguk mungalei ulen Kin engonen wae sitelas Ike kenak murum wan genggemen Wan penipinen we rupen lepas Lagu nyas munampi suyen Si mepat ukuren we situnung tapas Ike kenak male mulimusen Wan pengetamen sapatni ampas Lagu pena simutenulisen Turah sepeden wae urum kertas Ike kenak male ikalamen Wan lembaren pakat si jelas Lagu kerpe nurumi senuen Sipergunen sigere mulewas Ike menet singah kuwanni pelongohen Gere sara taon turah mupentas Lagu tongar tuyuh pelumpenen Beluh ari uken rum waih sideras Ike kenak ku toa iselalunen Wan atu mutehen kerna gere pantas Pinangan, 08 Oktober 2018

Nge mepat se pepanyi i amat Nomor pe nge tepat jelas mupari Ari kuen kiri munucepen selamat Langkah musapat murai kersi Urum niet tulus pemulo berangkat Munemahan amanat ari rakyat sirami Iwan perjelenen kire gere pulelekat Buge kase selamat kutaon si rai Muniro dukungen kubewene masyarakat Sire kunul kunul rapat taringen peri Kusi tetue i tiro nasehat I pengenen manat sekire kase mujadi Harapen ni kami ku wakil ni rakyat Gelah kase hemat iwanni berperi I osah kase ku kami sibermanfaat Enti macat macat kase turunni aspirasi Kul ate ni kami ku bewene si male berangkat Buge selamat gere muhehali Kin wakil ni kami simunamat mandat Gati gati rapat mumerah solusi Pinangan, 25 September 2018

Sikerna nge siep mupari keliliken Utem wan sengkaren murasa gunah Lepas ke die kase i tasaken Kune kati penjerangen gere kase matah Mubangur ke die rara sisintungen Beltek simuterbangen enti kire mujadi barah Ike orom bere kase bersijerohen Nge pasti asap kumata gere ne sawah Wanni parabuang tason pengemasen Nge sawah ulen turah i pinah Ku taon si jeroh kase i sebelahen Si kis ituninen enti sampe teridah Ike nge siep kase tama ni pelumen Gere ne ku son son tuang ni kuah Musara edang kase orom cebon Kusihpe i jurahen tetap mupaedah Gelah munerah ku bunge ni pingen Gere pat tuninen tetap we teridah Ike jarakpe kase i parinen Ike pemanganen kuatase we singah Pinangan, 25 September 2018

Anakku ... Lagu mubedanen ralik rum ujung iwanni tali Gere lepas sesereng ike male mubetihi Ku sibijak pane turah i kunei Ku si muilmu atas turah i kaji Anakku ... Atur ni baris simukalam peri Atas tuyuhe siturah i pahami Konot narue i sone mupari Kin pedoman murip turah betihi arti Anakku ... Sediken matalo sisabe ikalei Simucahya terang munyineri bumi Ike wanni kelem ulen kin pengganti Murum urum bintang simutamun rami Anakku ... Gelah lagu uren siturun munyiremi Munetahi senuen si mupucuk lemi Ike kase emun mulintes muriti Bidiken diri mujadi nami Gemboyah, 24 September 2018

Si murai olokdi dele Bermacam bage penemahni langkah Sesire kunul turuhen gambare Kin arapni oya i petetah Tutur jemen i uke mien Siselama ini nge meh bene Ara si sudere seba serinen Ara terdengan seba terume Lemut ni peri cerak melengkan Renye isawahen tujun maksudpe Sesara i kaji asal ni papan Turah ku meranti ike kin sanahpe Cerak sunguh nume ne berakah Sesire jejamah peri i pari Ike kase i izin ni Allah Turah munetah langkah arapni

Ulen syawal se nge sawah Ulak ku fitrah ike munurut kaji Muniro ampun sabe ku Allah Renye i jurah maaf ku kuen kiri Orom ama ine salam besemah Kangkui salah siselama ini Asa olok we nge kejang payah Senang susah kin buah hati Suami isteri oyape turah Ari deleni salah si nge terjadi Bidik renye maaf i iosah Gere ne kin barah kucakni kuni Kujiran tetangga renye semawah Gaeh ku umah renye matjari Renye i mulon kusiserap ni umah Sire mulangkah kubiak famili

Anakku ... Ku lalenen kao wan pengemekkenku Buge galakmu penaru ni ruesmu Urum do'a do'a kuulesen Kire mutuahmi kase kao Jarakmi ari seteru orom bele Anakku ... Tumung ni saka ku bumi mujejak Langkah berpapah penjule kaulmu Kutetatah urum do'a do'a Wan ralan pantasmu kire gere museltu Jarakmi ari ilet khianat rum dengki Anakku ... Kukunulen kao kutenumpitenku Kurenahen atasku kati setimang rata Kusisunen urum do'a do'a Iwanni donya buge bekoa kubuet si mara Berperala sijeroh nyata Pinangan, 18 September 2018

Anak amanah ari Tuhen Gelah jeroh kase kite mujegeie Enti sampe puren kin penyesalen Jeroh geree kite batange Tir bekoa ike ku buet salah Nasehat petuah bubun kin penetahe Si lepas i emahe buet i osah I tamahen amanah silepas i jujunge Mudidik anak asal gere temas Mera melas ike gere pane pane Enti i osah bercerak atas Enti sampe telas buet kotekke Pergaulene turah i jegei Enti luah jaluh kase pediangenne Muningetne gelah gati gati Ike nge musentat bidik renye netahie Kin jema tuee kitepe turah siep Enti bebarang ucep peri kemali Ike kite kase gere beredeb Makin ku anak oya siporaemi Pinangan,  16 September 2018

Mutumpuk emun siturun Kamul mutamun mulintesi dene Kupucuk simuleno singah senggayun Bernyanyun mulalenen ate Bedenang emus ni kuyu si lungun Tetepsi mutamun kin nami ahere Kupucuk silemi temetap mutumpun Galak mu runrun munosopen kale Ku cahya simubiner laing i sisun Taringen janyi beralun tingkahe Munenesi denem ku batang ni jejeron Iwanni sara rumpun mutaso tuahhe Pinangan, 13 September 2018

Seringkel kampung nge muloi isingahi Sesire dediang renye silaturahmi cerak cerak kucak ku kuen kiri male kin sepir langkah arapni jamut ni pumu gere mari mari ku biak sudere keber i kunei muah ke die gantang mubunge ke kupi sana sikurang gelah i ungeri Sire berberakah i inumen kupi Arih arih i uke tutur si temuni Kusilayak berabang kusimampat berengi Gere lupe pun kil orom ibi Itaringen tene kati sabe i ingeti Kertas serilah si mupoto belangi Rum tenulisen kucak siwarna warni Ara tikik kekata berupe janyi Kati enti museruk ike gaeh segermi I belkapen gambar ukuren 10 inci Tamahen mien ruje serupe pepanyi Wan kayu pesesuk irilingen tali Pinangan, 12 September 2018

Ketika marah itu diam Tumbuhkah benih benih dendam itu di hati Sementara Telinga ini hanya ingin mendengar Tentang solusi dan toleransi Ketika senang itu juga diam Berbungakah bahagia itu di hati Sementara Telinga ini hanya ingin mendengar Berapa banyak yang tersakiti karenanya Pinangan, 08 September 2017

Sawah perintah ku kite insen Kite dekaten diri kutuhen Simupengemasen renye berqerben Gere lepas terkoro kamingpe gere mukunah Setun seger we lepas i bueten Wan tulu lao i sara bulen Enti kire lale kite enti lupen Kin ingeten wan ulen dzulhijah Reta siara renye i sikahen Enti bewene keta i pergunen Kamul mukamul ara mubilangen I belinen qerben kati mudepet berkah Dengke siara ku sudere osanen Sesara tumpuk nge mepat bagien Kusilayak patut oya i mulonen Nikmat ni tuhen kukitepe teridah Niet wan dede gelah i pancangen Sertai doa gelah mukemudahen Ikhtier usaha enti sampe lupen Keta ku si gere ilen buge kase sawah Pinangan, 11 Dzulhijjah 1438 H

Nge siep batang edang wan pelumen Munampi cebon selo die sawah Wanni dulang rempak si kin paongen Isi ni pingen kire gere mubah Kin telangke bunge wan genggemen Munemah kekeberen wan ulung serilah Beminsel munango peruntungen Harum sitaringen buge mujadi kisah Ku emus ni kuyu pakat isisunen Munyenei teniron simale i tetah Wanni berakah renye isapaten Musara anguk i wanni kesah Wan nipi jege mulo i amalen Tures i panangen sareh teridah Munaturen langkah lao ibilangen Turah i temetapen kire gere mupepinah Pinangan, 19 Agustus 2018

Gere ku uloi laing siluah Sikerna matah seumpama kero Kutitiren kata simufaedah Kati teridah si peri mestike Gere kujangko ku si mujurah Sikerna simunosah lagu gere suke Kujamut we kase turah Nyanya muluah ike wan kemul mutenege Gere kudedik kati tair sawah Sikerna empu numah gere mumango Kukaraten bang we kase singah Tingkep beperngah pintu gere muke Gere kujelgit kati ruluh uah Sikerna tewah lepas i jangko Kusapihi bang kati ari tangke muluah Tasak semelah pangan gere semperne Gere ku sino kati teridah Sikerna musebelah orom layar ruje Kutingok bang we kase kusemelah Sibelejer murajah udah kase gerle Pinangan, 14 Agustus 2018

Ampuuuun reje... Kati ku anyung bange lelayang Kutiak sunguh ari pematang Sikerna arani kuyu kati temerbang Galak kire wanni emun bediang Udah kase... Ari kerna kekire si gere girang Muluah ari pumu kampulni benang Metuh muserban kucabang Tabi... Olokdi sayang si berate gure Ampuuuun reje... Pepantaren atan pematang Jalin getih ikot peregang Boh kire tasak raom siilang Kubio manuk simukekamang Udah kase... Ari kerna surak sigere runcang Kutangke ahere singah bediang Muleno mutewah batang Tabi... Olokdi sayang sisabe bejege Ampuuuun reje... Singah bang ku batang ruang Wan gergel tete alas pedenang Sawah renye siberedang Nge mepat isi ni dulang Udah kase... Ari kerna kunul olokdi jarang Kusi jarak gere tesulang Ike besapih udah kase mutuang Tabi... Olokdi sayang sikunul semile  Paya Rabu, 01 Agustus 2018

Tabi mulo kubewene sudere Udah ara kase sigere suke Laing kuluah asal sengeje Sikerna tume wan lipit ni baju Laing mutetayang ulah ulah gegebe Manuk sibejunte i taos gerle Cabang mulingang i asup mudere Terupen kuyu bedeso ari kipesni pumu Munuruhen gigih wan ledak ni ume Sibuk mumerjak tulak mien serde Simugerebek gabuk gere berede Terupen katak munuruhen puru Sedien tingkep kin penyine Kati tures mumanang sudere Gere telas sikunul semile Terupen mungeker ari kuduk ni pintu Ku berawang muniaken jele Muharap iken isi ni rege Runtakni doran lagu begerle Terupen relo murai simutabu Tu inih bun kin pendere Kati sikona murasa bise Awis ni pumu beralih tenege Terupen purih munuruhen behu Paya Rabu, 31 Juli 2018

Dep sesabi diri gere ne peduli Enti renye jema isalahen Dele sirike bage nge i cari Kenakke enti we sampe i taringen Dedemu uku asal gere gati Orom orom munampi i wan kenunulen Kin penyamung muharap ku tali Gere ilen mikot rupen nge i tussen Bersiingeten wanni silaturrahmi Sikerna tembuni i one tanomen Empu ni umah gere berasi asi Ozomtu bang jamu sibensawah ilen Ketier si ara gere telas gati Si nge itetahi mejen gere i turuhen Gere jep umah memang i peperi Sikerna arae nge mubilangen Ngenakken senuen mupucuk lemi Uyet penegep sabe kin jungkeren Lagu waih ituang wan keni Gere ilen engkip nge renye i tekaren Simumantik tersik nge jep sagi Si kin dirin mepat we rupen Sikiser kuduk gere ne teraloi Sidemu arap gere ne sejelen Paya Rabu,  21 Juli 2018

Tabi keta pemulo kusebut Kusilayak patut biak saudere Udah kase ara sikona sikut Enti nye muringut kerna gere sengeje Ari keras ni kuyu batang pe megut Uyet mujergut secara tibe tibe Kin cerak siluah lagu ling ni utut Nemah bau sengkiut munaringen mice Perupuhen ike gere patut I engon runut gere ne tertuho Ike i seluk baju nyunyut Lagu kaming ranut kona wih sara time Si terime labang lepas i sangkut Gere daleh ipunyut ujung ni ruje Iket ni pingang enti sampe muperlut Kati enti tetakut munuruhen rupe I jeje simera lagut Kati enti bangkrut munosopen lebe Gere bewene senuen nguk bejergut Oya kati mukerut uah si ijo I sulang ku awah gelah silemut lemut Kati enti burut isi ni tuke Ike terih salak munaringen parut Enti berangut iwanni dewe PAYA RABU, 24 JULI 2018

I tekei gelah selese Kati mepat sesi jemet sesi lise Kerna si nenget gere telas benee Bise simurasa itaringne kin tene Pelongohen si jeroh bubunge Gere kona sire ike uren lao Putuk si alus kune ne nutupe Murasa we porakke caya ni matanlo Beriring remalan wan sara dene Macam berbage cerite sirike Kutujuen kati gere musampe Sikerna nge mame janyi setie Pinangan, 11Juni 2017

Teduh kelender geh jadwal pasa Berubah gambar mulaen jema Renye kuselesei keta sara sara Jadwal berbuke gere ara mubeda Sana kati keta beta delewe Bermacam warna kuerah kertasse Ara gambar ni jema mucampur parte Siep betulis kekata berangke Simujule pelin singkite Ike i uke tutur bewene sudere Gere beteduh kelem porak lao Gati singah dangdang bebuke Tabi,  berakah iyo lao

Murui bang kenunulen Oya kati gere ilen temetap bepari Musagi kedie ilen suyen Oya kati seserenen mugeganti Mubeda kedie bunge ni pingen Oya kati pemanganen gere ne berkenduri Kucaktu bang die kuren Oya kati penjerangen bis kekendiri Berutem murum beremen Jangkat i arangen bergeganti Beratur rempak wanni sengkaren Turuhi uren tamun si tepi Pinangan, 04 Juni 2017

Kantihe gere ilen mutuah Kati gere singah kucabang bediang Kenunulen sigere ilen mutetah Timul ni gelisah wan batang ruang Tenironne gere ilen berosah Gere terjurah sijangko bertimang Emus ni kuyu memejen sawah Oya kati tewah gere mununungen lingang Wan porak ni lao gaeh ni serlah Simungalei basah munaso bimang Situres ku mata lepas ierah Sigere teridah gere ne terpanang Payarabu, 13 Mei 2018

Tikiktu bang utem kin penjerang Kati rara siilang gere ne kin pesiu Deletu bang waih wan dulang Kati nge musirang keliliken atu Oloktu bang anyungni lelayang Kati nge mutayang gere nunung kuyu Jaraktu bang ku atas temerbang  Kati pengampul ni benang luah ari pumu Jaraktu bang beluh bertanang Kati nge jarang mudenget pintu Galaktu bang sabe pulelingang Kati nge mu jarang kunul semilu  Konottu bang itetok labang Kati sampe mulekang papan ayu Relemtu bang berawang Kati nge mubuntang tauh ni atu Laletu bang iwanni berdiang Kati waih semiang gere terterime pumu Imen wan dede bang enti mukurang Kati waktu i timang kukuen selalu Pinangan, 24 Mei 2017

Osopni reduk beluhni uren Gere ne sejuk ko tubuh beden Idapur reduk taring penirunen Sesongkoten nge murai bere Nge galak punguk ngalei ulen Metuh ni cahya kutenumpiten Wan melem bute rinu isawahen Suntuk munampinen terang ni lao Ulung ni kupi likak betarinen Emusi kuyu sinemah kekeberen Pucuk silemi bersenggayunen Berulon ulon murai teniro Temerbang ni manuk berdedediken Uah wan tampuk bertetulakken Leno ni tangke munampi jamuten Siturah relanen ku si mujangko Pinangan 26 Februari 2016

Suyen ni umaha mulo tetahi Enti salahen rering sigati mulekang Enti salahen bubung sigati musirang Kerna oya penupang kati nguk mujadi Tungkukte nume tungkuk temuni Enti kilesi ku si pecengang Enti cogahi ku si mumanang Kerna oya nge terpancang i wanni janyi Peri amanah cuge ingeti Enti musesier ari dene silempang Enti mukiser ike ara musimpang Kerna oya nge terang turah i kowai Buet gelah mulo i pikiri Enti i surung sekire mulintang Enti i tunung sekire mutentang Kerna oya terlarang ike munurut kaji Pinangan, 07 Mei 2017

Kelibette kadang teridah Mulangkah iwanni senye Mudetak kuate munaringen gunah Telas benemah mujujungen resie Muketike tene berosah Gere bertenah gaeh ni si mujule Mujangko asa gere bejurah Mubekas ni langkah wan melem bute Kayu bang simurebah Bertingkah tewah mugerle Rum seserenen atu nge musebelah Mupinah taon muniro Tingkep gati muperngah Muluah kekire wan dede Pemanangen gerene muarah Sisingah nume ne singkite Pinangan, 28 Maret 2017

Ke gere muterkuk senuk rum kuren Selo kire tasak penjerangen Laing mukertuk aduk kiri kuen Bersisauten mungalei ranas Ike gere muserempuk porak rum uren Selo kire sawah pesam nibeden Tene teridah segegik ringisen Penawar i inumen kati gaeh temas Kegere lepas uah i jangkonen Selo konot ni tubuh renye kin ceraken Naru ni batang turah i renahen Sige sesuken kati musampe ku atas Ike gere sawah isi suketen Selo renye turah are i tukeren Dele tikikke asal nge kin ukuren Turah timangen kati jelas jelas Kegere berering umah i sidingen Selo kuyu siberemus renye i salahen Kin sejukke ike gere tehen Turah ampisen bierpe rum tepas Paya Rabu, 25 Maret 2018

Engi... Konotmu nge bernaru Kucakmu nge berkaol Besilo kao nge kin tupang tumpu Taon besere iwanni kunul Engi... Mubilangen kire ni umurmu Muganti tun si nge berlalu Kin langkah selalu kire gere museltu Jelen lempang gere ne muleliku Engi... Tige puluh tun besilo umurmu Wan sara tamunen kite musilu Do'a mutentu ku kao sabe mutuju Lepas semiang kami tatangen pumu Engi... Kite tiro buge lanyutmi umurmu Jeger jeger sabe tubuhmu Musampe bewene tenironmu Bahgie iwan muripmu Pinangan, 22 Maret 2018

1.      Titok/Keleng Generasi Paling Tua 2.      Rekel                  : Turunan dari Titok/Keleng 3.      Entah                  : Turunan dari Rekel 4.      Muyang               : Moyang, di bawah Entah 5.      Datu                  : Para datu-datu adalah di bawah moyang (1 s/d 4, sudah termasuk leluhur) 6.      Datu Rawan         : Orang tua ( bapak dari kakek ) 7.      Datu Banan          : Orang tua ( Ibu dari kakek ) 8.      Awan Pedih  ...