Hasrin Zulthain Bersah

ABANG KUL Jejak ni saka memejen begerdak Kerpe mulewas waih mulimak Besilo nge dekat si biasae jarak Munemah galak ari uwes ni ate Taonmu si murime se nge terang Penaru ni murip nge jarang jarang Gere ne ara taon berdiang Nge meh lapang gerene mukerpe Ari kerna nyanya i wanni uten Besilo turun ku perkampungen Nge musepit ari kiri kuen Kusi kadunen gere ara simumenge Gere ne ara si berate galak Tempat betunah gere ne ledak Waih si kaul nge muloi mutemak Ikepe ulak isi nge taonne Luwes mata mumanang  Isi ni rime nge meh kabang Kayu si kaul nge betebang Turah muang si emis nome Gaeh ni abang kul kin dedediken Kuso kuini kin bienen Olok di sengsara tubuh beden Gere terperinen kune nyanyae Nge meh gelana si kaul kucak Wan perjelenen dele ni rerak Mupitet ni dene urum arul kolak Nge meh nadak kusihmi belohe Muiringen rami wan gelep terang Berulon ulonen munuju pematang Si munetut memakin runcang Olokdi sayang meh mucere bere Isihmi die rime si mu uten Isihmi die waih nenirinen Isihmi die...

Mokotdi nge beluhe Se nge teridah mien rupee Ara rupen simale raie Ulakke kin beluh mien Ari manemi isihen die taringe Simale nentong gere mepat singahe Keber sisawah olok jarak taringe Tenah gere musampe nge minter telas wan ni kenunulen Kin pemampat kire sawahe Cerak cerak kucak janyipe osahe Berasup mien netah perempusenne Kin penebesse parang i kamulen Lagu mutuker pepanyi i emahe Mulaen gambar mubeda warnae Kekata mupari ituyuh ni gambare Oya oya sabe iosahe harapen Pinangan, 14 Nopember 2017

Kusi i perahi serge si osop Nge meh sesop gere ne mubere Pebening i wanni jamur gogop Nge teronop gere ne berjege Relem metuh mukerlop Timul ni gelep wan terang lao I kire benyer si sikep Wan alas belintep gaeh ni rike Penemah ni dene nge turah beb Lepas kin penelep ari kuyu berdeso Si mununung kire gere musungkep Gere mulungkep bierpe muranyo Turah mera berupuh tengkedep Kerna gere siep munaos ruje Ike kenaken telas mujerilep Gelah kep wan puro bertaso Kin tetunungen peri si terucep Mera terungkep wan peri sengeje Kati i pasang wan umah tingkep Ike arape mulikep temas munyino Pinangan, 15 November 2018

Denem ni ate munaso rinu Paong berlagu nge osop bene Se nge belongoh tuyuh kayu rubu Taring basamu mununung dene Tewah ni pucuk iemusi kuyu Kunul kuperdu sire bejunte Ulu petungkuk lale wan sebuku Jangin simunalu gerene musampe Naru ni jelen se nge buntu Nge mutumpu gere mudene Beluh sekejep wan ralan naru Taon situju mudemu ahere Caya ni ulen nge telen rau Orom matanlo gerene mudeme Arape bintang siberiring naru Sikin suluh terang osop ahere Pinangan 2016

Mununung silepas i tunung Enti tangung asupni kekire Ike nyanya ku langkah sirung Silempang tumung padehne i cuge Munyuep silepas i suep Enti becerkop sulangni kero Ike becemenca udah gere siep Mera sampe rungep ku salak mutene Munyuen silepas i suen Inih bereden gere murip mujengkele Ike mubunge gere lepas ilen Ngukken i reden uwah i tiro Mubaca silepas i baca Ku titik koma enti sampe lupe Ike gere pane murangke kekata Mumenge keta enti ne coco Mujerang silepas i jerang Rum bere si Ilang enti bedewe Ike waih rum oros gere tertimang Kekappe mutatang mujadi bele Munikot silepas i ikot Sibersemet simetus punce Ike kekire masih ilen konot Ngukken ongot kunul semile Pinangan, 21 November 2019

Bercerak munurut kaji Kati belangi kekata si luah Ike kenak manis berperi I turuti nasehat amanah Senuen kati mujadi Berkeleh ari kerpe sisingah Ike kenak gere kona rui I jegei jejak ni langkah Ku waih renem muniri I kersati tume si teridah Ike kenak male bau wangi Urum sabun mandi rembege i sesah Munikot turah urum tali I semeti si muleluah Ike kenak jalin mujadi Enti si mukeri kuel i perah Murum wan jema rami Bage si cari sire berberakah Ike kenak gere i senei Kelehen diri kutuyuh ni geloah Rerak male i lumpeti Berasi asi cara i tetah Ike kenak tanyor gere muhali Kekire diri mulo i petetah Unung unung buet kemali Sinume nemah diri daleh i olah Ike kenak rupe belangi Turah gati gati ku cermin munerah Pinangan, 23 November 2019

Bersamamu... Banyak cerita yang terurai Tentang suka Tentang duka Begitu banyak tawa pun air mata Garis garis yang kita satukan Walau tak serupa Walau kerap berbeda Masih tetap dengan makna yang sama Karena kita percaya Bersamamu Banyak waktu yang hilang Terabaikan oleh rindu yang meraja Karena cinta harus bersama Meski warna warna yang kita punya Tak pernah sama Tak kan pernah sama Keindahan itu kita temui disana Karena kita percaya Bersamamu Banyak bahasa berkalimat Menerjemahkan kata Tentang rasa Tentang beda Kita selipkan pada keinginan Tidak berubah Tidak berganti Pesonanya kan tetap menggoda Karena kita percaya Bersamamu Kita satukan asa Kita padukan cita Karena bahagia itu milik kita Dan kita percaya Pinangan, 25 November 2019

Bilangen ni umur opat mukire Khalisa Althaf kao i rasi Harapen ku kao gere terhinge Kasih sayang ama ine gere mutepi Tegep sesukmu mujadi bahgie Pane berkekire munetahi diri Harapen ni kami buge semperne Gere mukulu kie iwanni muripni Galakmu munaringen tene Kenyeh menye ku kerlang munyerei Pongotmu mujadi luke Gere berede wan tenumpitenni Kedikmu sesire bersene Renye muniro si male i kenakki Musampe turah si jangko Bierpe galah muleno turah we mujadi Ku Allah kamipe muniro Gere mera rede wan do'a ni kami Jarak ari seteru gaip ari bele Buge rembege gere mera lesi Pinangan, 23 November 2019

By. Ridha Mafhaza Musampe ke die kase Wani ate lagu si mulelibet Male male mupuru buletni niet Wan jadi gere jadi parini buet Lagu si mejen rejen tekadang kiset Sahen ke die si wan hakiket....? Musampe ke die kase Jarak ku pepanang kao setangke Timul karu wan tengah lale Mejen kudekatiwe kenake Tekadang melas langkah gere musampe Mudemu ke die puren i ujungni dene....? Musampe ke die kase Regangni lumpe berbenang sembilu Harapen sige ari batangni pelu Pinteni ate berpapah selalu Sediken nume enti bersesal sebuku Isihen die parimu legen atu....? Musampe ke die kase Galah pengayuh rilahni lumu Isesempak gelumang ralanni perau Mempas ku atu i tetiak kuyu Gunah gunah karu enti kire mutabu Sawah ke die kusi kutuju....? Musampe ke die kase Naruni dene nge bersipet Si kin nemah nge bersuket Rinu orom denem nge bersemet Wan male demu lagu si geh pipet Petemun kedang mupitet....? Kelowang Tue, 28 November 2019

Ike dele tiang i sesuken Nge pasti tegep rering sibelkapen Bubung mususun kin pelongohen Wan porak uren gere ne nyanya Kin penupang oya harapen Lepas mien kin seserenen Wan musingkih kin amat amaten Kuet ipantiken wanni donya Sekire sara tiang kase mukernyon Tair nye bidik itetahen Enti sampe renye berpoloken Bersiingeten sekire male kona Ike kenakken siep jamur i tossen Kin tupang sesuk enti lupenen Turah sige i pasangen suyen Oya andalen kin naos istana Tiang silime turah perhatinen Ku kite bewente enti sampe lupen Kin penamah kati tegep mien I tempuhi mien tiang siara Kutereje, 27 Desember 2019

Mubilangi jeroh gere mari mari Bage si cari macam si rike Mumutihen salak ku jema rami Kotekpe belangi telas ni rupe Cerak sitikik renye i tamahi Mubungei diri olok pedi suke Sikucak kucak i kauli Makin i anguki gerene berede Segele buet kati mujadi Turuhen diri paling mugune Parinen tene ku kuen kiri Kati i ingeti bewene sudere Tikik munosah renye i peperi Nge jep kenduri sawahne berite Sesire murum mienne i kaji Mubungei diri petukel tue Munipaken dagu ike jema berperi Sipet dengki asal gere pure Gere mera galak ike i ejeri Renye timul dengki ku bewene heme Si larang Allah si kowai Nabi Enti peralai wanni dede Sipet kotek oya gere muarti Jaraken diri kati enti kin bele Pinangan, 03 Januari 2020