Langsung ke konten utama

MUCHSIN HASAN - TAUFIK

Inile uah numene mutik
Gere ne usik kite munerah
Nge tepang Muchsin Hasan orom Taufik
Sawah amanah turah munetah
Sesuk numele tersik
Mupantik tegep berolah
Bibes cerdas rum lisik
Gerene urik sareh kite erah
Nomor due resmi wan uruten
King i amaten si roa jari
Gere musier ne kukiri kuen
Kin handalen munetahi Gayoni

Enti ne bimang gelahmi tunungen
Rintisni jelen limus belangi
Ike kenak ara muperubahen
Inile pilihen entine sangsi
Do'a sempena tamah mien dukungen
Renye bersisawahen ku biak famil
Muchsin - Taufik oya harapen
Buge kase lepas kin pemimpin Gayo ni

Pinangan, 27 Oktober 2016

Komentar

Postingan populer dari blog ini

BELUHE KIN ULAKE

Mokotdi nge beluhe Se nge teridah mien rupee Ara rupen simale raie Ulakke kin beluh mien Ari manemi isihen die taringe Simale nentong gere mepat singahe Keber sisawah olok jarak taringe Tenah gere musampe nge minter telas wan ni kenunulen Kin pemampat kire sawahe Cerak cerak kucak janyipe osahe Berasup mien netah perempusenne Kin penebesse parang i kamulen Lagu mutuker pepanyi i emahe Mulaen gambar mubeda warnae Kekata mupari ituyuh ni gambare Oya oya sabe iosahe harapen Pinangan, 14 Nopember 2017

OSOP

Denem ni ate munaso rinu Paong berlagu nge osop bene Se nge belongoh tuyuh kayu rubu Taring basamu mununung dene Tewah ni pucuk iemusi kuyu Kunul kuperdu sire bejunte Ulu petungkuk lale wan sebuku Jangin simunalu gerene musampe Naru ni jelen se nge buntu Nge mutumpu gere mudene Beluh sekejep wan ralan naru Taon situju mudemu ahere Caya ni ulen nge telen rau Orom matanlo gerene mudeme Arape bintang siberiring naru Sikin suluh terang osop ahere Pinangan 2016

ANAKKU VIII

Bilangen ni umur opat mukire Khalisa Althaf kao i rasi Harapen ku kao gere terhinge Kasih sayang ama ine gere mutepi Tegep sesukmu mujadi bahgie Pane berkekire munetahi diri Harapen ni kami buge semperne Gere mukulu kie iwanni muripni Galakmu munaringen tene Kenyeh menye ku kerlang munyerei Pongotmu mujadi luke Gere berede wan tenumpitenni Kedikmu sesire bersene Renye muniro si male i kenakki Musampe turah si jangko Bierpe galah muleno turah we mujadi Ku Allah kamipe muniro Gere mera rede wan do'a ni kami Jarak ari seteru gaip ari bele Buge rembege gere mera lesi Pinangan, 23 November 2019