Langsung ke konten utama

OPAT SIPET NABI


Murip turah muteleden
Kati semperne sana si buetten
Ku sipet ni Rasul gelah kite munengon
Buge kase lepas kite amalen

Sipet si pemulo keta kejujuren
Gere mubeda cerak orom perbueten
Gere pecogah munosah jeweben
Bierpe bermacam bage kase pengunen

Sipet si kedue oya kepercayaen
Gere mubeda cerak orom tenulisen
Beta kite siterime beta i sawahen
Bierpe dele kase penosahen

Sipet si ketige keta Penyawahen
Gere berongot tir i sederen
Munosah keber jeroh ku biak serinen
Bierpe terang gelep porak lao uren

Sipet si ke opat oya Kecerdasen
Gere asal tangkuh cerak i luahen
Turah siep ilmu orom pengetahuen
Nguk kin teleden kusi kiri kuen

Keta ku kite selaku insen
Sipet ni Rasul turah tunungen
Wan muripni oya kite buetten
Temas i denie orom akherat puren

Takengen, 22 Januari 2016
Label:

Komentar

Posting Komentar

Postingan populer dari blog ini

BELUHE KIN ULAKE

Mokotdi nge beluhe Se nge teridah mien rupee Ara rupen simale raie Ulakke kin beluh mien Ari manemi isihen die taringe Simale nentong gere mepat singahe Keber sisawah olok jarak taringe Tenah gere musampe nge minter telas wan ni kenunulen Kin pemampat kire sawahe Cerak cerak kucak janyipe osahe Berasup mien netah perempusenne Kin penebesse parang i kamulen Lagu mutuker pepanyi i emahe Mulaen gambar mubeda warnae Kekata mupari ituyuh ni gambare Oya oya sabe iosahe harapen Pinangan, 14 Nopember 2017
Posting Komentar
Baca selengkapnya

OSOP

Denem ni ate munaso rinu Paong berlagu nge osop bene Se nge belongoh tuyuh kayu rubu Taring basamu mununung dene Tewah ni pucuk iemusi kuyu Kunul kuperdu sire bejunte Ulu petungkuk lale wan sebuku Jangin simunalu gerene musampe Naru ni jelen se nge buntu Nge mutumpu gere mudene Beluh sekejep wan ralan naru Taon situju mudemu ahere Caya ni ulen nge telen rau Orom matanlo gerene mudeme Arape bintang siberiring naru Sikin suluh terang osop ahere Pinangan 2016
Posting Komentar
Baca selengkapnya

ANAKKU VIII

Bilangen ni umur opat mukire Khalisa Althaf kao i rasi Harapen ku kao gere terhinge Kasih sayang ama ine gere mutepi Tegep sesukmu mujadi bahgie Pane berkekire munetahi diri Harapen ni kami buge semperne Gere mukulu kie iwanni muripni Galakmu munaringen tene Kenyeh menye ku kerlang munyerei Pongotmu mujadi luke Gere berede wan tenumpitenni Kedikmu sesire bersene Renye muniro si male i kenakki Musampe turah si jangko Bierpe galah muleno turah we mujadi Ku Allah kamipe muniro Gere mera rede wan do'a ni kami Jarak ari seteru gaip ari bele Buge rembege gere mera lesi Pinangan, 23 November 2019
Posting Komentar
Baca selengkapnya