Langsung ke konten utama

OROP KIN BIAK

Denangni alas si belipet due
Taon semile si sawah singah
Mukamul rempak bewene sudere
Male bercerite munuke kisah

Tamun si kaul mujadi tene
Nge siep sedie sekire benemah
Kusi tujuen kone kase i jule
Ku tempat si mulie nge turah sawah



Iringen naru gere berulo ulo
Sikerna tujuen nge mepat arah
Beramik pumu kin tene setie
Enti ara kekire sampe muluah

Jeroh bermanat ku duduk ni tenge
Enti bebarang uke kase pintu ni umah
Ike kase gaeh jema si mujule
Enti i terime sekire kase munosah

Si kaul ni ate turah i jule
Gere mukulu kie iwan berlangkah
Murai petemun ku langit ijo
Buge semperne ku bumi sawah

Ari ramini biak gere bewene suke
Rupen sempolo si dele teridah
Gere ne musampe si male i jule
Ku duduk ni tenge ulakke sawah

Pinangan 7 Mei 2019
Label:

Komentar

Posting Komentar

Postingan populer dari blog ini

BELUHE KIN ULAKE

Mokotdi nge beluhe Se nge teridah mien rupee Ara rupen simale raie Ulakke kin beluh mien Ari manemi isihen die taringe Simale nentong gere mepat singahe Keber sisawah olok jarak taringe Tenah gere musampe nge minter telas wan ni kenunulen Kin pemampat kire sawahe Cerak cerak kucak janyipe osahe Berasup mien netah perempusenne Kin penebesse parang i kamulen Lagu mutuker pepanyi i emahe Mulaen gambar mubeda warnae Kekata mupari ituyuh ni gambare Oya oya sabe iosahe harapen Pinangan, 14 Nopember 2017
Posting Komentar
Baca selengkapnya

OSOP

Denem ni ate munaso rinu Paong berlagu nge osop bene Se nge belongoh tuyuh kayu rubu Taring basamu mununung dene Tewah ni pucuk iemusi kuyu Kunul kuperdu sire bejunte Ulu petungkuk lale wan sebuku Jangin simunalu gerene musampe Naru ni jelen se nge buntu Nge mutumpu gere mudene Beluh sekejep wan ralan naru Taon situju mudemu ahere Caya ni ulen nge telen rau Orom matanlo gerene mudeme Arape bintang siberiring naru Sikin suluh terang osop ahere Pinangan 2016
Posting Komentar
Baca selengkapnya

ANAKKU VIII

Bilangen ni umur opat mukire Khalisa Althaf kao i rasi Harapen ku kao gere terhinge Kasih sayang ama ine gere mutepi Tegep sesukmu mujadi bahgie Pane berkekire munetahi diri Harapen ni kami buge semperne Gere mukulu kie iwanni muripni Galakmu munaringen tene Kenyeh menye ku kerlang munyerei Pongotmu mujadi luke Gere berede wan tenumpitenni Kedikmu sesire bersene Renye muniro si male i kenakki Musampe turah si jangko Bierpe galah muleno turah we mujadi Ku Allah kamipe muniro Gere mera rede wan do'a ni kami Jarak ari seteru gaip ari bele Buge rembege gere mera lesi Pinangan, 23 November 2019
Posting Komentar
Baca selengkapnya